Dyn wedi’i bigo 160 o weithiau gan wenyn meirch yn ei dŷ

Cafodd dyn ei bigo 160 o weithiau gan wenyn meirch ar ôl i’r pryfed ymosod ar ei gartref.

Dywedodd Andrew Powell, 57, nad yw wedi gallu cysgu oherwydd y boen ers yr ymosodiad ddydd Sul, a bu angen triniaeth ysbyty.

Dywedodd y trefnwr gwyliau o Aberhonddu fod yr awyr wedi “troi’n frown” gyda wenyn meirch ar ôl i ffermwr lleol darfu ar nyth mewn cae.

“Mi wnes i faglu o gwmpas blaen y tŷ ac i mewn i’r gawod, ond fe wnaethon nhw fy nilyn i, a’m pigo trwy fy nillad yn y gawod,” meddai.

“Roedd yr ystafell ymolchi yn llawn ohonyn nhw.”

Dywedodd iddo gael ei bigo 15 o weithiau ar gefn ei ben, ond fe lwyddodd i osgoi cael ei bigo yn ei wyneb.