Degau’n sâl ar ôl sesiynau mwytho anifeiliaid ar fferm

Dywedodd Su Mably o Iechyd Cyhoeddus Cymru (ICC) eu bod yn “gweithio’n agos gyda phartneriaid i ymchwilio i’r achosion yma ac i ddeall a oes risg ehangach i’r cyhoedd.

“Rydym yn annog unrhyw un sydd wedi ymweld â’r fferm, yn enwedig y rheiny a aeth i’r sesiynau bwydo a mwythau, ac sydd nawr yn profi symptomau, i gysylltu â’u meddyg teulu.”

Mae prif symptomau cryptosporidiwm yn cynnwys dolur rhydd, poenau yn y stumog, teimlo’n sâl, gwres, dim awydd bwyd a cholli pwysau.

“Mae symptomau fel arfer yn cychwyn rhwng dau ddiwrnod a 10 ddiwrnod ar ôl cyswllt gyda’r paraseit ac mae’n gallu para am hyd at bythefnos,” ychwanegodd.

“Gall plant a phobl sydd â system imiwnedd gwan fod yn agored iawn i effeithiau’r haint.”

Fe wnaeth ICC hefyd annog pobl i ddilyn trefn hylendid da wrth ymweld â ffermydd, gan gynnwys golchi dwylo ar ôl cyffwrdd ag anifeiliaid, peidio bwyta neu yfed ar y safle, tynnu sgidiau a’u gadael y tu allan, a chadw golwg ar blant bach.

Dywedodd y Cynghorydd Ruba Sivagnanam, aelod cabinet Bro Morgannwg ar gyfer gwasanaethau ymgysylltu cymunedol, cydraddoldeb a rheoleiddio, fod yr awdurdod yn ymwybodol o’r achosion o’r haint a’u bod yn “gweithio gyda’r busnes i rwystro unrhyw achosion eraill o salwch”.