Canolfan i agor ar gyfer holl glybiau chwaraeon Cymraeg Caerdydd

Fe gadarnhaodd llefarydd ar ran Cyngor Caerdydd eu bod yn ystyried cynnig i osod stafelloedd newid Pontcanna ar les i glwb cymunedol.

Dywedodd y llefarydd fod “trefniadau o’r fath, lle y bydd clybiau’n cymryd cyfrifoldeb am reoli a chynnal safleoedd eisoes yn help i nifer o glybiau chwaraeon ar draws Caerdydd i ddefnyddio ffrydiau ariannol fyddai ddim ar gael i gynghorau lleol.

“Mi all clybiau elwa o’r buddsoddiad hwnnw i wella’u cyfleusterau a gwella’r hyn maen nhw eisoes yn ei gynnig i’n cymunedau.”

Mi fyddai angen noddwyr, a chyfranddalwyr mae’n debyg, a byddai angen i’r fenter fod yn hunangynhaliol yn y pen draw.

Y bwriad ydy cael caffi a bar yn y Ganolfan a bod honno ar agor saith diwrnod yr wythnos, gyda chryn ddibynnu ar wirfoddolwyr ar y dechrau er fe allai swyddi parhaol ddod yn sgil hynny.

Fe allai ail ran o’r cynllun gynnwys codi caeau chwarae newydd, ond fe fyddai hynny ymhellach i’r dyfodol.