Pwytho enwau Cymraeg Eryri ar garthenni i’w diogelu at y dyfodol

Cafodd y gwehydd Anna Pritchard ei magu ar fferm odro yn ardal Dyffryn Ogwen, ac eglurodd ei bod hi’n gwybod pa mor bwysig yw “cadw’r tradoddiadau” a’r “hanes”.

“Mae fy ngwaith fel arfer yn gofnod o hanesion a thraddodiadau ffermio – mae fy nheulu yn un o’r teuluoedd amaethyddol hynaf sy’n dal i weithio yn Nyffryn Ogwen.

“Dwi’n gwybod pa mor bwysig yw gwarchod yr hanes – dwi’n teimlo’n freintiedig dros ben fod y Parc wedi gofyn i mi wehyddu’r rhain,” meddai.

Bu Anna, sydd bellach yn byw yn ardal Glasinfryn yng Ngwynedd, yn mynychu rhai o’r sesiynau ‘galw i mewn’ ei hun, lle cafodd wrando ar y gymuned a’r ffermwyr yn adrodd yr enwau lleoedd coll:

“Gatws Uffern… Cae Moch… mae’n bwysig dal arnyn nhw,” meddai.

“Mae wedi cymryd dros flwyddyn i mi gynllunio’r pum carthen – roedd angen i mi ddewis fy hoff enwau o’r casgliad, ond hefyd gwneud fy ngwaith ymchwil arnynt.

“Dwi’n gwneud bob dim efo llaw – roedd pwytho pob enw yn cymryd o leiaf chwarter awr!” ychwanegodd.