Llety gwyliau: Cynnig newid rheolau treth dadleuol ar ôl ‘gwrando’

Mae newidiadau wedi cael eu hawgrymu gan Lywodraeth Cymru i’w rheolau treth dadleuol ar gyfer perchnogion llety gwyliau hunanddarpar.

Ers 2023, mae’n rhaid i letyau gwyliau Cymru fod ar gael am 252 diwrnod a’u gosod am 182 diwrnod bob blwyddyn er mwyn talu trethi annomestig yn lle treth gyngor uwch – yn ogystal â phremiwm ail gartrefi mewn nifer o achosion.

Cafodd y rheolau eu cyflwyno, medd y llywodraeth, i “sicrhau bod perchnogion eiddo yn gwneud cyfraniad teg at eu cymuned leol”.

Mae’r llywodraeth nawr yn cynnig caniatáu i berchnogion llety gwyliau ddefnyddio 182 diwrnod ar gyfartaledd dros sawl blwyddyn.

Mae hefyd am ganiatáu hyd at 14 diwrnod o wyliau am ddim a roddir i elusen i gyfrif tuag at y targed o 182 diwrnod.

Mae ‘na rybudd y gallai miloedd o swyddi yn y sector twristiaeth gael eu colli yng Nghymru os nad oes newidiadau i’r rheolau.

Dywedodd Ysgrifennydd y Cabinet dros Gyllid a’r Gymraeg, Mark Drakeford eu bod wedi “gwrando ar y rhai sy’n gweithio yn y sector ac yn cynnig newidiadau bach i’r rheolau presennol i’w cefnogi.”

Ond dywedodd Cymdeithas yr Iaith bod hyn yn “brawf pellach” bod y llywodraeth yn “ddiegni ac yn cysgu”.

Mae Cymdeithas Broffesiynol Hunan-arlwywyr (PASC) hefyd wedi beirniadu’r cyhoeddiad, gan ei alw’n “ystum symbolaidd sy’n methu â mynd i’r afael â’r argyfwng go iawn sy’n wynebu busnesau twristiaeth Cymru”.

Ar ran y Ceidwadwyr, dywedodd Gareth Davies AS fod y rheol 182 diwrnod yn “niweidiol”.

“Ni fydd twtio o gwmpas yr ymylon yn helpu busnesau sy’n ei chael hi’n anodd. Byddai’r Ceidwadwyr Cymreig yn lleihau’r trothwy 182 diwrnod i 105 diwrnod,” meddai.