Gorau Chwarae Cyd Chwarae: Hanes arwyddair tîm pêl-droed Cymru

Russell oedd golwr Pont-y-clun ac ysgrifennydd y clwb ond roedd hefyd yn ddylanwadol yn rhengoedd Cymdeithas Bêl-droed Cymru gan ddod yn llywydd rhwng 1967 a 1972.

Wrth i’r Gymdeithas ddathlu ei phen-blwydd yn 75 oed yn 1951, cafodd y penderfyniad ei wneud fod angen bathodyn, gydag arwyddair oddi tano i’w roi ar y crys coch.

A dyna pryd ymddangosodd ‘Gorau Chwarae Cyd Chwarae’ am y tro cyntaf, a hynny yn erbyn tîm dethol X1 Prydain Fawr.

Roedd yr arwyddair yn ymddangos o dan fathodyn o’r ddraig ar gefndir gwyrdd ac wedi ei amgylchynu gan 11 o gennin, gan gynrychioli 11 o chwaraewyr y tîm a hefyd symbol cenedlaethol Cymru.

Erbyn hyn mae’r arwyddair ar grys Cymru wedi ei wahanu o’r bathodyn, gan ymddangos ar gefn y coler; daeth y newid yn 2019.

Yn ogystal â chael ei wisgo ddydd Gwener gan Gymru wrth iddynt wynebu Twrci, fe fydd yr arwyddair hefyd yn ymddangos ar grysau Pont-y-clun wrth iddynt droedio i’r cae yn erbyn Prifysgol Abertawe ddydd Sadwrn.

Cafodd y clwb o Rondda Cynon Taf ei ffurfio yn 1896 gan ymuno â Chymdeithas Bêl-droed Cymru yn 1922.

Erbyn hyn maen nhw’n chwarae yn Ardal De Orllewin, Cynghrair Pêl-droed Cymru.