Ffordd liniaru’r M4 yn dal i gynhyrfu’r dyfroedd cyn yr etholiad

Mae arweinydd Reform UK yn y DU, Nigel Farage, wedi sôn am ddefnyddio cyllid preifat i’w adeiladu, gyda phosibilrwydd hefyd o godi tollau.

Mewn dadl etholiad ar Channel 4, dywedodd Dan Thomas – arweinydd y blaid yng Nghymru – y byddai modd ailgyfeirio cyllid rheilffyrdd a’i wario ar briffyrdd.

Dywedodd nad oedd mwyafrif o’r saith gorsaf drên sydd wedi cael cefnogaeth gan Lywodraeth y DU yn “hanfodol nac eu heisiau”.

Mae gwariant ar reilffyrdd yn cael ei reoli gan Lywodraeth y DU, tra bod ariannu priffyrdd yn ddyletswydd Llywodraeth Cymru – daw’r arian felly o gronfa wahanol.

Dyw maniffesto’r Ceidwadwyr ddim yn datgelu sut y bydden nhw yn talu am y ffordd liniaru, ond yn ôl llefarydd byddai’r costau yn cael eu rhannu gyda “Llywodraeth nesaf y DU”.

Maen nhw’n gwrthod y syniad o godi tollau.

Mewn dadl etholiad Wales Online, dywedodd arweinydd Plaid Cymru Rhun ap Iorwerth ei fod o blaid datrys y tagfeydd trwy wella ffyrdd, ond fe wrthododd ymrwymo i gynllun penodol.

Dywedodd llefarydd ar ran Plaid Cymru fod y cynlluniau gwreiddiol “wedi dyddio”, gyda strwythurau diogelu’r amgylchedd yng Ngwent wedi’u cryfhau.

“Fe fyddwn ni’n ystyried pa mor ymarferol, fforddiadwy a chynaliadwy y byddai ffordd newydd, a’r effaith amgylcheddol cyn penderfynu ar y camau nesaf,” meddai.