Effaith ‘catastroffig’ tanau gwair ar fywyd gwyllt

Mae ffigyrau sydd wedi’u casglu gan BBC Cymru yn dangos i ddiffoddwyr orfod brwydro bron i 1,400 o danau gwair yn barod eleni.

“Ry’n ni’n bryderus ofnadwy, mae hyn yn edrych fel petai’n mynd i fod y flwyddyn waethaf ar gyfer gweld ein bywyd gwyllt yn y fflamau,” meddai Ben MacCarthy, pennaeth cadwraeth natur yr Ymddiriedolaeth Genedlaethol.

Roedd mamaliaid, amffibiaid ac ymlusgiaid bychan yn ogystal â phryfed yn cael eu “llosgi’n fyw”, meddai.

“A hynny wedyn yn amharu ar y gadwyn fwyd yn ei chyfanrwydd oherwydd heb y creaduriaid rheini dyw’r adar sydd yn ddibynnol arnyn nhw ddim yn medru goroesi,” ychwanegodd.

Galwodd am gyllid gan lywodraethau’r DU i helpu ffermwyr a thirfeddianwyr adfer mawndiroedd ar yr ucheldir, gydag ardaloedd gwlyb i atal tanau, darparu cynefin, ac amsugno carbon.