Cynnydd ‘dychrynllyd a siomedig’ mewn ymosodiadau ar griwiau tân

Fe gofnododd y Swyddfa Gartref 967 o ymosodiadau ar griwiau tân ar draws y DU yn ystod y flwyddyn 2023-2024 – cynnydd o 60% o’i gymharu â 10 mlynedd ynghynt.

Dywedodd Steven Davies, Rheolwr Grŵp Gwasanaeth Tân ac Achub Canolbarth a Gorllewin Cymru, eu bod yn gweithio’n agos gyda’r heddlu er mwyn erlyn troseddwyr.

“Rhaid i ni addysgu pobl am y peryglon,” meddai, “ac am y ffaith, pe tai rhywun yn taflu tân gwyllt atom, bod hi’n drosedd i ymosod ar weithiwr gwasanaeth brys.

“Mae gyda ni CCTV ar y cerbyd ac fe gewch chi eich erlyn am y drosedd yna os ydych yn cael eich adnabod fel y person a daflodd y tân gwyllt.

“Os ddown ni ar draws coelcerth sy’n rhy agos at adeilad, fe wnawn ni ei diffodd a gweithio gyda’r heddlu a’r awdurdodau lleol i fonitro unrhyw goelcerthi all fod yn rhy fawr neu’n rhy agos at adeiladau.”