Cymdeithas yn Sir Gâr yn noddi Seren er mwyn ‘cynnig help ymarferol’

Dywedodd Deborah Rees fod y broses o baru ci yn cael ei chynllunio’n ofalus er mwyn sicrhau bod pob ci yn addas ar gyfer ffordd o fyw ac anghenion ei berchennog newydd, gan ystyried personoliaeth, maint a chyflymder pob ci.

Meddai: “Mae’r ci yn gallu newid bywyd rhywun yn llwyr.

“Gall olygu’r gwahaniaeth rhwng byw’n annibynnol ac yn hyderus neu deimlo’n ynysig oherwydd colli golwg.”

Ychwanegodd fod cŵn tywys yn helpu pobl i symud o gwmpas yn ddiogel, ond hefyd yn aml yn “agor y drws i sgyrsiau a chysylltiadau cymdeithasol newydd.”

Dywedodd fod Cŵn Tywys Cymru yn dibynnu bron yn gyfan gwbl ar roddion gan y cyhoedd.

“Rydyn ni mor ddiolchgar am gefnogaeth Coda Ni.

“Rydyn ni’n gobeithio y byddan nhw’n cael llawer o lawenydd wrth weld Seren yn tyfu a gwybod y bydd hi, gobeithio, yn mynd ymlaen i newid bywyd rhywun.”

Bydd Coda Ni hefyd yn derbyn lluniau a diweddariadau rheolaidd am gynnydd Seren wrth iddi dyfu a symud drwy ei hyfforddiant.