Academi ffilm o Gymru’n anelu am wobr mewn gŵyl ryngwladol

Mae’r academi yn gynllun unigryw. Dyma’r ysgol ffilm gyntaf o’i math yng Nghymru, lle does yna ddim ffioedd i blant a’u teuluoedd.

Fe gafodd ei sefydlu tua wyth mlynedd yn ôl, ac mae’n cael ei noddi gan elusennau gan gynnwys Plant mewn Angen, ac mae croeso i ieuenctid o bob cwr o Flaenau Gwent a thu hwnt.

Mae tua 110 o bobl ifanc yn aelodau o’r academi, sy’n cwrdd tair gwaith yr wythnos ac yn cynnal dosbarthiadau yn cynnwys actio, sgriptio, gwaith camera, colur a chynhyrchu ffilm.

Yn ôl Kevin Phillips mae’r academi yn gwneud mwy na dysgu sgiliau technegol yn unig.

“Mae gwaith tîm yn bwysig i ni fan hyn, ac mae gwaith tîm gwych yn helpu i gynhyrchu ffilmiau gwych!”

Wrth i mi gyrraedd yr academi roedd tua 30 o bobl ifanc o bob oed wrthi yn ymarfer ar gyfer cynhyrchiad mawr sydd ar waith gan y myfyrwyr ar hyn o bryd.