Ymlusgiaid sy’n gohirio adeiladu ysgol Gymraeg yn cael eu symud

Amcangyfrifwyd yn wreiddiol y byddai symud yr ysgol i safle mwy yn costio tua £18.6m, gyda 525 o leoedd ar gyfer plant rhwng pedair ac 11 oed a meithrinfa gyda 90 o leoedd.

Nid oes amcangyfrif newydd o unrhyw gynnydd mewn costau o ganlyniad i’r oedi wedi’i gyhoeddi.

Dywedodd llefarydd ar ran Cyngor Sir Pen-y-bont ar Ogwr wrth y BBC: “Mae’r cynlluniau moderneiddio ysgolion ar gyfer Ysgol Gymraeg Bro Ogwr yn parhau i wneud cynnydd ac, yn dilyn darganfod nadroedd defaid a madfallod ar y safle newydd, mae lleoliad arall addas wedi’i nodi ac mae trawsleoli ymlusgiaid yn digwydd ar hyn o bryd yn unol â rheoliadau ecolegol.

“I gefnogi’r gwaith o ehangu niferoedd disgyblion cyn agor yr ysgol newydd, mae dwy ystafell ddosbarth dros dro newydd wedi’u gosod ar safle’r ysgol bresennol, ac mae’r prosiect hefyd wedi sicrhau cyllid grant o £1.1m gan Lywodraeth Cymru i gefnogi’r gwaith o ddarparu cyfleuster gofal plant cyfrwng Cymraeg wedi’i gydleoli fel rhan o ddatblygiad ehangach yr ysgol newydd.

“Mae arolwg diweddar gan Estyn o wasanaethau addysg y cyngor wedi canmol ein rhaglen moderneiddio ysgolion am ei haliniad â Chynllun Strategol y Gymraeg mewn Addysg.”