Y fet o Geredigion sy’n ‘joio’ ar fferm Jeremy Clarkson

“Gweld All Creatures Great and Small yn blentyn oedd un ysgogiad ac ro’n i’n gweld fy hun fel James Herriot,” meddai Dilwyn Evans.

“Roeddwn i hefyd yn licio gwaith ysgol ac ro’dd Mam, yn enwedig, yn pwsho ni lot adre’ i wneud gwaith ysgol. Ro’dd hi ei hunan wedi gorfod aros adre’ i helpu ar y fferm.

“Fydd neb yn gallu mynd â dy radd oddi wrthot fyddai ei geiriau ond ro’dd hi’n anodd cael lle i fod yn fet ac roedd rhaid cael tair A.

“Ges i sioc pan ges i’r tair A ac wedi blwyddyn o waith gyda milfeddygon yn Llanbed es i i Gaeredin – tipyn o hiraeth, cofiwch.

“Bues i’n lwcus iawn o ddyn llaeth, mab i ffrind i Mam, oedd yn byw yno ond ro’n i’n hiraethu am adre’ bob tro ro’n i’n ei weld e!

“Fe adawodd y pedwar ohonon ni adre’ – ro’dd hi’n drueni bron bod neb wedi cymryd y ffarm drosodd.”