Rhyfel y Falklands: Dim bai ar gatrawd o’r fyddin

Doedd dim bai ar gatrawd o’r fyddin pan gafodd llong y Sir Galahad ei bomio yn ystod Rhyfel y Falklands, yn ôl dogfennau sydd wedi eu cyhoeddi am y tro cyntaf.

Bu farw 48 o bobl pan gafodd y llong gyflenwi, oedd yn cario milwyr Prydeinig, ei tharo gan awyrlu’r Ariannin yn 1982.

Roedd 32 o’r rheiny’n aelodau o’r Gwarchodlu Cymreig, a chafodd yr uned ei beio am ddryswch, oedi, ac am beidio gadael y llong.

Ond mae dogfennau cyfrinachol sydd wedi dod i law BBC Cymru bellach wedi rhyddhau’r gwarchodlu o unrhyw fai.

“Dan ni’n cael bai ar gam ers 42 o flynyddoedd… bod ni ddim digon ffit, bod ni heb baratoi digon a bod ni ddim digon da i fod yna felly mae’r gwir allan yna rŵan,” meddai Maldwyn Jones, fu’n aelod o’r Gwarchodlu Cymreig ac oedd ar fwrdd y llong.