Galw am newid y Cynllun Ffermio Cynaliadwy sydd ag ond traean o ffermwyr Môn

Fe benderfynodd Brian Bown, o fferm Trewyn ger Llannerch-y-medd, ei fod am ymuno â’r cynllun.

Mae’n cynhyrchu ŵyn cynnar ac yn cadw tua 800 o ddefaid, yn pesgi tua 170 o wartheg stôr ac yn tyfu cnydau.

Roedd llofnodi i gael mynediad i’r cynllun yn benderfyniad anodd iddo meddai, ac mae’n dal yn anhapus â threfniadau cynefinoedd oedd yn rhaid iddo gyflwyno er mwyn gwneud hynny – gan fod y tymor tyfu gwair ar yr ynys yn gynharach na mewn rhannau eraill o’r wlad meddai.

“Roedd yna dipyn o bwyso a mesur ar y cychwyn.

“Os ydych chi allan o’r cynllun ry’ chi yn colli 40% o’r arian oeddech chi yn ei gael llynedd,” meddai Mr Bown.

“Hynny oedd y penderfyniad – os galle’ ni gymeryd yr ergyd o golli hynny.”

Er mwyn cael mynediad bu rhaid cau caeau i ffwrdd am fisoedd ac roedd hynny yn faich meddai ac ansawdd y borfa yn gwaethygu.

Dywed Mr Bown bod rhaid iddo aros nawr yn y cynllun ond “baswn i yn hoffi gweld y cynllun yn cael ei addasu i’r dyfodol,” ychwanegodd.