‘Rhaid gwneud rhywbeth’ i warchod plant ar-lein – Prif Weinidog Cymru

Ond does dim awgrym y bydd y llywodraeth yn gorfodi ysgolion i wahardd ffonau symudol.

“Dwi ddim yn meddwl amdano yn nhermau gwaharddiad, dwi yn meddwl amdano yn nhermau camau sy’n gallu cael eu cymryd mewn nifer o feysydd gwahanol,” meddai.

“Un peth ‘da ni isio ei wneud ydy grymuso ysgolion i wneud y penderfyniad yna, fel mae llawer wedi’i wneud yn barod, i gymryd ffonau oddi ar ddisgyblion.”

Ar hyn o bryd, does dim gwaharddiad cenedlaethol ar ffonau symudol mewn ysgolion yng Nghymru.

Mae’r penderfyniad i wahardd neu gyfyngu ar ddyfeisiau yn parhau i fod yn fater i ysgolion unigol a’u cyrff llywodraethu.

Yn Lloegr, mae yna fwriad i basio cyfraith fel bod rhaid i ysgolion ddilyn y cyngor presennol y dylai pob ysgol fod yn rhydd o ffonau clyfar drwy’r dydd.

Yr hyn sy’n bwysig, meddai’r Prif Weinidog, “yw’r sylweddoliad o’r niwed sy’n gallu dod i blant a phobl ifanc, unai drwy ddefnyddio cyfryngau cymdeithasol neu ffonau mewn ysgolion, sydd yn rhywbeth ar wahân”.