Rhai plant ysgol wyth oed ‘dal methu defnyddio’r tŷ bach’

Yn ôl Claire Armitstead o ASCL Cymru, sy’n cynrychioli penaethiaid, mae “cynnydd mawr” wedi bod ers y pandemig yn nifer y plant sydd angen help i fynd i’r tŷ bach.

Ychwanegodd nad gosod “rhieni yn erbyn ysgolion” oedd bwriad y polisi, ac mai’r pryder mwyaf yw’r amser mae’n ei gymryd i athrawon, nid eu bod nhw’n anfodlon helpu.

“Dros Gymru gyfan mae nifer o ysgolion yn ei chael hi’n anodd, achos does ganddyn nhw mo’r arian na’r adnoddau i barhau i helpu plant yn y modd yma,” meddai.

“Os oes gen i bump cynorthwyydd yn fy ysgol, a phedwar ohonyn nhw’n helpu plant heb anghenion i ddefnyddio’r tŷ bach, dydyn nhw ddim yno i gefnogi gyda’r addysg.

“Mae angen i asiantaethau weithio gyda’i gilydd i sicrhau bod gan bobl y gefnogaeth iawn i baratoi eu plant ar gyfer yr ysgol.”