‘Nabod rhai o’r bobl yma? Archif ‘anhygoel’ ymgyrchu gwleidyddol

Dros yr wythnosau diwethaf mae taflenni wedi eu gwthio drwy flychau post ar hyd a lled Cymru yn erfyn arnon ni i roi croes drws nesaf i enw penodol ar 4 Gorffennaf…

Ond mae rhannu dogfennau gwleidyddol cyn etholiad yn hen arferiad gyda channoedd ar gannoedd wedi eu casglu yn archif y Llyfrgell Genedlaethol – gyda’r hynaf yn dyddio yn ôl i 1837.

Maen nhw’n taflu goleuni ar agweddau a phynciau llosg y dydd, yn dangos llwybr gwleidyddol ffigyrau amlwg cyn iddyn nhw ddod yn adnabyddus – ac uchelgais sawl un na lwyddodd.

Erbyn heddiw mae timoedd bychain ymhob ardal yn casglu’r holl ddeunydd gwleidyddol sy’n cael eu cynhyrchu cyn etholiadau er mwyn eu cadw yn Yr Archif Wleidyddol Gymreig.

Yn ôl Rob Phillips, archifydd y casgliad – sydd ar gael ar-lein, dolen allanol: “Mae’n adnodd anhygoel.”