‘Her’ denu athrawon sy’n siarad Cymraeg – Llywodraeth Cymru

Mae’r ystadegau diweddaraf yn siom ond ddim yn syndod i Undeb Cenedlaethol Athrawon Cymru, sy’n rhybuddio “am flynyddoedd bod ‘na argyfwng recriwtio i’r proffesiwn”.

“Chwarae efo’r ymylon” yw disgrifiad Ysgrifennydd Cyffredinol yr undeb, Ioan Rhys Jones, o gynlluniau’r llywodraeth hyd yma i wella’r sefyllfa.

Gan ddadlau nad yw’r cynlluniau hynny’n mynd yn ddigon pell i lenwi’r bwlch wrth i gannoedd gefnu ar y proffesiwn, dywedodd wrth Dros Frecwast mai “buddsoddiad sylweddol yn y gyfundrefn addysg” sydd angen fwyaf.

Mae aelodau’r undeb, meddai, yn “dweud yn gyson bod nhw dan eu sang efo gwaith”, ac yn cael trafferth dygymod gyda dosbarthiadau mwy a phroblemau ymddygiad cynyddol.

“Mae miloedd yn gadael y proffesiwn yn eu pum mlynedd gynta’ – dydyn nhw ddim yn gweld bod y balans bywyd / gwaith yn ddigon da i barhau,” meddai.

Oni bai bod amodau gwaith yn gwella, ychwanegodd na fydd y proffesiwm yn ddeniadol o raddedigion ‘chwaith.