Hen ffotograffau sy’n dangos bywyd yng Nghymru yn yr 1800au

Y dyddiau yma, mae’n bosib dogfennu bywyd bob dydd gydag un cyffyrddiad o ffôn symudol ac ychwanegu’r llun i’r miloedd sy’n y teclyn yn barod.

Roedd yn broses llawer mwy cymhleth yn nyddiau cynnar ffotograffiaeth a phrin oedd y bobl oedd yn gallu defnyddio’r cyfrwng newydd – heb sôn am allu fforddio’r cyfarpar.

Nawr mae Amgueddfa Cymru wedi rhyddhau rhai o’r ffotograffau cynharaf yn eu harchif, nifer yn dogfennu bywyd yr 1800au a dechrau’r 1900au, sydd am ddim i’r cyhoedd.

Mae’r lluniau yn rhan o blatfform Delweddau Amgueddfa Cymru, dolen allanol sy’n cynnwys dros 2,000 o eitemau, o waith celf i luniau o gasgliadau cenedlaethol.

Maen nhw ar gael i’w lawrlwytho am ddim o’r wefan at ddefnydd masnachol ac anfasnachol. Dyma rai o’r hen ffotograffau yn y casgliad sy’n rhoi cipolwg o fywyd yng Nghymru sydd wedi hen ddiflannu.