Enwi bachgen 17 oed fu farw yn dilyn digwyddiad yn Abertridwr

Mae’r heddlu wedi enwi bachgen 17 oed fu farw yn dilyn digwyddiad yn Abertridwr, sir Caerffili, ddydd Iau.

Cafodd plismyn eu galw i Stryd Francis Isaf yn Abertridwr tua 17:45 ddydd Iau ar ôl adroddiadau fod bachgen yn ei arddegau wedi cael ei anafu’n ddifrifol.

Bu farw Tristan Shae Kerr, o Abertridwr, wedi’r digwyddiad.

Mae tri dyn – un 26 oed o Lundain, un 24 oed o Abertridwr ac un 18 oed o Gaerdydd – wedi cael eu harestio ar amheuaeth o lofruddiaeth.

Mae dwy fenyw – un 28 oed o Henffordd ac un 24 oed o Senghennydd – wedi cael eu harestio ar amheuaeth o gynorthwyo troseddwr.

Mae’r pump yn parhau yn y ddalfa ac mae teulu Tristan yn cael eu cefnogi gan swyddogion arbenigol, meddai’r llu.