Dyffryn Aman: ‘Ddim wedi gweld dim byd tebyg i hyn’

Wedi i ddau athro ac un disgybl orfod cael triniaeth ysbyty yn dilyn digwyddiad yn Ysgol Dyffryn Aman, dywedodd aelod lleol o’r Senedd bod y digwyddiad wedi “ysgwyd y gymuned gyfan”.

Wrth siarad ar Dros Frecwast fore Mercher, soniodd Cefin Cambell AS am brofiad ei frawd a oedd yn un o’r rhai cyntaf i gyrraedd y digwyddiad.

“Oedd e’n brofiad ofnadwy iddo fe, wrth gwrs, ac i holl staff a disgyblion yr ysgol,” meddai Mr Campbell, yr Aelod o’r Senedd dros Ganolbarth a Gorllewin Cymru.

“Dwi ‘di siarad ‘da fe neithiwr – mae e yn amlwg wedi cael ei ysgwyd gan y digwyddiad ond yn fwy na hynny mae e wedi bod yn athro yn ysgol ers 40 mlynedd – ei swydd gynta fe ar ôl coleg ac mae e wedi bod yna trwy’i yrfa.

“Dyw e ddim wedi gweld ddim byd tebyg i hyn… Mae’r holl ddigwyddiad annisgwyl yma wedi ysgwyd y gymuned gyfan ac mae rhywun yn meddwl am y rhai sydd wedi gorfod mynd i’r ysbyty a’r gymuned a’r rhieni hefyd sy’n dal i fod mewn sioc bore ‘ma.”