Dros 100 heb le i arddangos defaid yn y Sioe Frenhinol

Mae nifer o ffermwyr Cymru yn rhwystredig wedi i’r ffenestr i wneud cais i arddangos anifeiliaid yn y Sioe Fawr yn Llanelwedd eleni, gau dros ddeng niwrnod cyn y dyddiad cau swyddogol, sef 18 Mai.

Y rheswm. yn ôl y trefnwyr. yw bod nifer aruthrol – mwy nag erioed – wedi cofrestru, sy’n golygu bod dros 100 bellach ar restr aros.

Er iddi ennill sawl pencampwriaeth yn y gorffenol, dywedodd Olwen Roberts sy’n 15 oed na fydd hi’n mynd i’r Sioe o gwbl os na fydd modd iddi gystadlu gyda’i defaid.

Dywed Prif Weithredwr y Sioe ei fod yn deall ac yn derbyn y sylwadau sy’n dod o gyfeiriad y ffermwyr, ond yn ôl Aled Rhys Jones: “Mae’n rhaid i ni sicrhau ein bod ni’n cynnal cydbwysedd ar draws y Sioe.”

“Mae’n rhaid i ni sicrhau bod ‘na ddigon o le i’r gwartheg, a’r moch a’r geifr, a’r adrannau eraill wrth gwrs, yn ogystal â’r holl stondinau sy’n dod i’r Sioe, felly mae’n anodd wrth gwrs i wneud y penderfyniadau yma.”