Disgwyl cadarnhad mai Eluned Morgan fydd arweinydd Llafur Cymru

Mae angen pleidlais ffurfiol ar lafar yn y Senedd cyn i’r prif weinidog newydd gael ei gadarnhau.

Gydag un ymgeisydd yn unig hyd yma, gallai Mr Gething roi’r gorau iddi yn gynt na’r disgwyl – gan olygu bod angen galw’r Senedd yn ôl o doriad yr haf.

Cafodd BBC Cymru wybod yn gynharach yn yr wythnos fod trafodaethau wedi digwydd rhwng swyddfa’r prif weinidog, Llafur Cymru a’r Senedd.

Byddai angen i’r Senedd gael cais gan Lywodraeth Cymru i alw’r Senedd yn ôl.

Er y byddai cais o’r fath yn cael ei ganiatáu, nid yw cynlluniau llawn yn cael eu gwneud eto ac nid oes dyddiad ar gyfer galw aelodau yn ôl.

Mae’r bleidlais yn ei gwneud yn ofynnol i bob aelod o’r Senedd ddweud ar lafar pwy ddylai fod yn brif weinidog yn eu barn nhw, ac mae rhai ohonynt ar wyliau dramor ar hyn o bryd.

Mewn egwyddor fe allai’r wrthblaid, gydag union hanner y niferoedd yn y Senedd, atal Ms Morgan rhag cael ei chadarnhau trwy gefnogi un ymgeisydd.

Ond nid yw hynny’n mynd i ddigwydd a bydd gan Lafur y niferoedd i gael cadarnhad o’u prif weinidog newydd.

Mae Jane Dodds o’r Democratiaid Rhyddfrydol yn bwriadu ymatal, tra bod y Ceidwadwyr Cymreig a Phlaid Cymru yn bwriadu enwebu eu harweinwyr eu hunain.