Dim ymchwiliad ffurfiol cyn diswyddo Hannah Blythyn

Ni chynhaliodd Llywodraeth Cymru ymchwiliad ffurfiol i sut yr aeth negeseuon testun dadleuol i’r cyfryngau cyn i Hannah Blythyn gael ei diswyddo am eu rhyddhau yn honedig, meddai uwch swyddog.

Mae Ms Blythyn wedi gwadu rhyddhau negeseuon dadleuol yn dangos Vaughan Gething yn dweud wrth weinidogion eraill ei fod yn dileu negeseuon testun o sgwrs grŵp.

Dywedodd Plaid Cymru ei bod yn “gynyddol glir” bod gweithredoedd y prif weinidog wrth ei diswyddo yn dangos “diffyg tryloywder”.

Mae Llywodraeth Cymru wedi cael cais am sylw.

Dywedodd Mr Gething ym mis Mai nad oedd ganddo “ddim dewis arall ond gofyn i Hannah Blythyn adael y llywodraeth” ar ôl adolygiad o’r “dystiolaeth sydd ar gael i mi”.

Mae’r gwrthbleidiau wedi mynnu bod y dystiolaeth yn cael ei chyhoeddi – mae Mr Gething wedi gwrthod.

Mae llywodraethau a chyrff cyhoeddus eraill yn aml yn cynnal ymholiadau i geisio darganfod sut mae gwybodaeth gyfrinachol wedi cael ei rhyddhau i’r wasg.

Roedd Ms Blythyn wedi bod yn weinidog partneriaeth gymdeithasol.