Dim llais ffurfiol i’r Senedd wrth benodi cadeirydd S4C

Ysgrifennodd Delyth Jewell, cadeirydd pwyllgor diwylliant y Senedd, at ysgrifennydd diwylliant Llywodraeth y DU, Lisa Nandy, yn gofyn iddi gynnwys y Senedd yn ffurfiol yn y broses yn dilyn penodi cadeirydd newydd S4C, Delyth Evans, yn gynharach eleni.

Dywedodd Ms Jewell: “Er ein bod yn cydnabod bod darlledu yn fater sydd wedi’i gadw i Lywodraeth y DU, mae’n gysylltiedig yn annileadwy ag amrywiaeth o faterion datganoledig gan gynnwys y Gymraeg (sy’n arbennig o wir o ran S4C).

“Mae’n anomaledd nad yw’r pwerau dros yr unig ddarlledwr gwasanaeth cyhoeddus sy’n gweithredu’n unig yn y Gymraeg yn nwylo’r genedl lle mae’r iaith honno’n cael ei siarad yn bennaf.

“Felly, yn y dyfodol, credwn y dylai’r pwyllgor yn y Senedd sy’n gyfrifol am gyfathrebu a diwylliant gynnal gwrandawiad cyn penodi gyda’r ymgeisydd a ffefrir.

“Credwn y byddai’r craffu ar ddarlledu ac atebolrwydd y rhai sy’n gyfrifol am redeg sefydliadau darlledu yn gwella pe byddai’r Senedd yn cael rôl.”

Mae’n nodi fod Llywodraeth Cymru wedi’i chynrychioli ar y panel asesu ymgynghorol.

Fodd bynnag, meddai: “Rydym o’r farn y dylai’r cyfrifoldeb am wneud penodiad o’r fath gael ei wneud ar y cyd rhwng Llywodraeth y DU a Llywodraeth Cymru.”