Carcharu cyn-was sifil o Geredigion am gamymddwyn

Mae cyn-swyddog gyda’r Weinyddiaeth Amddiffyn wedi cael ei garcharu am gamymddwyn mewn swydd gyhoeddus, wedi iddo gymryd taliadau a nwyddau yn gyfrinachol.

Fe wnaeth Jeffrey Cook, 67 o Geinewydd yng Ngheredigion, dderbyn gwerth tua £70,000 o arian a cheir tra yr oedd wedi ei gyflogi gan y weinyddiaeth.

Ar y pryd, roedd rheolau’r Weinyddiaeth Amddiffyn yn atal gweithwyr rhag derbyn cyflogaeth allanol, clywodd Llys y Goron Southwark ddydd Gwener.

Cafodd Cook ei ddedfrydu i 30 mis o garchar, a gorchymyn i dalu £123,817.06 o fewn tri mis.

Clywodd y llys mai Cook oedd yn gyfrifol am gyllid ei adran rhwng 2004 a 2008, a’i fod wedi comisiynu ME Consultants Limited – lle’r oedd ganddo gyswllt personol – i greu adroddiadau ar gyfer y Weinyddiaeth Amddiffyn.

Cafodd cyfanswm o £702,800 ei yrru o’r Weinyddiaeth Amddiffyn i gyfrif banc ME Consultants.