Babi naw mis oed wedi marw yn dilyn ymosodiad ci

Mae babi naw mis oed wedi marw yn dilyn ymosodiad ci yn Sir Fynwy.

Dywed Heddlu Gwent eu bod wedi “derbyn adroddiad o ymosodiad gan gi” mewn tŷ yn ardal Crossway ym mhentref Rogiet, ger Cil-y-coed tua 18:00 nos Sul.

Fe gafodd swyddogion heddlu a pharafeddygon y Gwasanaeth Ambiwlans eu hanfon i’r cyfeiriad, ble y cadarnhawyd bod babi naw mis oed wedi marw yn y fan a’r lle.

Mae’r ci wedi cael ei symud o’r eiddo, medd y llu, sy’n apelio am wybodaeth.

Dywedodd y Prif Uwcharolygydd John Davies: ” Rydym yn deall y bydd yna bryderon ynghylch y digwyddiad yma, ond mae swyddogion yno’n bresennol ac fe fyddan ni gwneud rhagor o ymholiadau wrth i’r ymchwiliad fynd yn ei flaen.”

“Os oes gyda chi bryderon neu wybodaeth, dewch atom er mwyn siarad â ni.”