Aelod Seneddol Bangor Aberconwy yn derbyn triniaeth canser y fron

Cadarnhaodd Ms Hughes ei bod wedi derbyn ei llawdriniaeth gyntaf yn Ysbyty Gwynedd ddydd Gwener, gan ddweud mewn neges ar-lein ei bod hi nawr “yn debygol o fod angen cwrs o gemotherapi a radiotherapi”.

Ychwanegodd fod y “diagnosis a’r driniaeth dwi wedi eu cael hyd yn hyn yn Ysbyty Gwynedd wedi bod yn anhygoel”.

O ran ei gwaith fel Aelod Seneddol, dywedodd y byddai “angen i mi gymryd cam yn ôl dros yr wythnosau a’r misoedd nesaf – o ran peidio bod allan ac o gwmpas yn yr etholaeth gymaint ag ydw i fel arfer”.

“Dwi eisiau i chi wybod fy mod i yn dal yma i’ch cynrychioli chi, i ymladd ar eich rhan ac mae fy nhîm dal yma i’ch helpu chi yn union fel arfer – gyda gwaith achos a phopeth arall y gallech chi fod angen.

“Bydda’ i’n gwneud fy ngorau glas i ddod dros hyn, i ddychwelyd a gwneud fy rôl fel eich Aelod Seneddol, gan ymladd dros ein dyfodol yma ym Mangor Aberconwy.”