Creu swyddi newydd wrth i gwmni bwyd o’r gogledd ehangu

Cafodd cwmni bwyd Harlech ei sefydlu yn nhref Harlech yn 1972 gan Colin a Gill Foskett.

Y bwriad gwreiddiol oedd cyflenwi’r farchnad wyliau ond yn y blynyddoedd diwethaf mae’r cwmni wedi ehangu gan gyflenwi tai bwyta, tafarndai, ysgolion ac ysbytai ledled Cymru a rhai yn Lloegr.

Erbyn hyn mae plant y sylfaenwyr yn rhedeg y busnes.

Wrth i’r busnes dyfu mae’r cwmni yn bwriadu gwario £3.5 miliwn ar ehangu eu pencadlys yn Llanystumdwy, gan gynnwys adeiladu warws newydd, cyfleusterau rhewi bwyd a mwy o gerbydau dosbarthu.

Roedd yna 25% o gynnydd yn nhrosiant y cwmni y llynedd wrth iddyn nhw gael y gwerthiant uchaf erioed – £75 miliwn.

O ganlyniad, mae disgwyl i nifer y staff o fewn y cwmni godi o 320 i 370 yn ystod blynyddoedd nesaf.

Y nod o hyd yw cefnogi cynnyrch a chyflenwyr Cymreig.