Ynys Môn: Galw am gyfarfod brys yn sgil ‘malu awyr’ dros Wylfa

Yn yr un cyfarfod Ddydd Mawrth bydd yr awdurdod hefyd yn trafod pryderon am nifer y cynlluniau solar mawr sydd ar y gweill.

Ym mis Tachwedd fe gyhoeddwyd oedi i benderfyniad ar gynllun solar Alaw Môn er mwyn galluogi i ddatblygwyr ddarparu mwy o fanylion, wedi i’r cynllun ddenu dros 500 o wrthwynebiadau.

Gan orchuddio tua 662 acer, byddai’r cynllun 160MW yn cynhyrchu digon o drydan i ddiwallu anghenion holl gartrefi’r ynys, ond poeni mae llawer am golli tir amaethyddol o safon.

“Tra bod ynni adnewyddadwy yn hanfodol, mae’n rhaid i ni flaenoriaethu datblygiadau cynaliadwy sy’n cael eu cefnogi gan y gymuned,” ychwanegodd Llinos Medi.

“Mae’r gwrthwynebiadau yn dangos pa mor gryf mae pobl yn teimlo am warchod ein tir, cymunedau ac amaethyddiaeth.”

Ond mae cynllun solar llawer mwy hefyd yn disgwyl caniatâd cynllunio gan Lywodraeth y DU.

Byddai cynllun 350MW Lightsource BP, i’r gogledd a’r dwyrain o Lyn Alaw, bron bum gwaith yn fwy na’r fferm solar weithredol fwyaf yn y DU, gan orchuddio ardal o faint 1,700 o gaeau pêl-droed.