Ymgeisydd Reform yn ymddangos pe bai’n gwneud saliwt Natsïaidd mewn llun

Yn ôl ei broffil ar LinkedIn, roedd Edwards yn uwch gynorthwyydd seneddol yn Nhŷ’r Cyffredin o fis Hydref 2019, ac roedd yn fargyfreithiwr cyn hynny.

Mewn datganiad dywedodd Edwards: “Mae llun o flynyddoedd lawer yn ôl wedi’i rannu yr wyf yn cydnabod ei fod yn edrych yn ddrwg a gellid ei gamddehongli.

“Mae gwahaniaeth clir rhwng defnydd cyffredin o’r ystum erchyll, o’i gymharu â minnau’n dynwared defnydd pêl-droediwr Cymreig ohono, neu yn wir gerddediad Basil Fawlty.”

Dywedodd fod y gyfundrefn Natsïaidd “y mwyaf barbaraidd erioed, ac ni fyddwn byth yn ysgafnhau nac yn gwanhau ei difrifoldeb”.

“Ymladdodd fy nhad-cu annwyl yn erbyn y Natsïaid ac roedd ei frawd-yng-nghyfraith yn Garcharor Rhyfel. Rwy’n hyrwyddwr pybyr dros Iddewiaeth, ac rwy’n ffieiddio wrth weld y gorymdeithiau gwrth-Semitaidd agored diweddar ar strydoedd Prydain”, meddai.

“Fel llawer o bobl ifanc, rydw i wedi gwneud camgymeriadau. Ond rydw i’n falch o’r person ydw i heddiw a’r gwerthoedd rydw i’n eu cynrychioli, a gobeithio y bydd pobl yn fy marnu ar broffesiynoldeb sut rydw i’n ymddwyn fel ymgeisydd a’r cyfraniad y gallaf ei wneud yn y dyfodol.”

Dywedodd llefarydd ar ran Plaid Cymru ei fod yn “hollol warthus” a dywedodd fod gan Reform “gwestiynau difrifol i’w hateb ynghylch eu proses fetio”.

Mae Reform wedi bod yn ymosod ar ymgeiswyr Plaid Cymru am negeseuon cyfryngau cymdeithasol yn ystod y dyddiau diwethaf.

Ymddiswyddodd un ymgeisydd Plaid Cymru ar ôl i Reform ddod o hyd i neges a oedd yn ei ddangos yn defnyddio term sarhaus am blant mewn sgwrs ar Twitter.