Y Democratiaid Rhyddfrydol yn addo mwy o bwerau i Gymru

Cynnig teg yw ffocws y maniffesto, ac i weithiwyr fe allai hynny olygu newidiadau o ran taliadau salwch neu gynnydd yn yr amser a’r arian mae rhieni yn ei gael ar ôl cael plentyn.

Os ‘da chi’n weithiwr ar gytundeb ‘dim oriau’ am fwy na 12 mis, mae’r blaid am roi’r hawl i chi wneud cais am gytundeb sefydlog.

Mae’r maniffesto hefyd yn cyfeirio at gynyddu grymoedd Llywodraeth Cymru.

Mae’r arweinydd, Ed Davey, yn dweud y bydden nhw’n datganoli pwerau’r heddlu i Gymru, rhoi mwy o bwerau benthyg i Lywodraeth Cymru, ac yn datganoli’r grym dros ddarlledu.

Ac fel sydd eisoes yn digwydd yn etholiadau’r Senedd, mae nhw eisiau rhoi’r bleidlais i bobl ifanc 16 ac 17 oed ar gyfer etholiadau San Steffan.

Er bod gan y Democratiaid Rhyddfrydol nod hir dymor o ail ymuno â’r Undeb Ewropeaidd, nid dyna sydd yn y maniffesto.

Yn hytrach, mae’n son am berthynas llawer agosach, sy’n cael gwared â gymaint o rwystrau â phosib ar gyfer masnach.