Y Cymro sy’n darganfod llongau enwog ar waelod y môr

Mae gweithio ar y môr yn rhywbeth eithaf cyffredin, boed hynny fel pysgotwr, yn gweithio ar longau masnach neu fel aelod o’r Llynges.

Ond mae swydd Leighton Rolley o Gaerdydd yn golygu ei fod yn mynd miloedd o droedfeddi dan arwyneb y dŵr, gan wneud ymchwil gwyddonol a chwilio am longau coll.

“Dwi’n dod o’r Tyllgoed yng Nghaerdydd yn wreiddiol, ac es i i Ysgol Uwchradd Cantonian. O’n i yng Nghaerdydd nes o’n i yn fy 20au cynnar, ac yna es i weithio ar y môr.

“O’n i’n mynd i’r llyfrgell leol yn yr 1980au hwyr, yn darllen llyfrau am y Titanic pan ddoth nhw mas tua 1987 neu 1988, pan o’n i’n chwe neu saith mlwydd oed. Roedd hynny’n gyfuniad perffaith o dechnoleg ac archwilio moroedd, ac o’n i’n gwybod fod hynny’n rhywbeth o’n i am ei wneud.

“Felly ‘nes i cyfrifiadureg yn y brifysgol, ac un o’r llefydd i weithio ar leoliad oedd yn y ganolfan oceanographic yn Southampton, ac es yno i weithio am flwyddyn yn wreiddiol, cyn cael swydd barhaol. O’n i’n gweithio ar y llongau ymchwil, gyda Southampton fel pencadlys.”