Sut mae siarad Cymraeg yn effeithio ar eich safbwynt gwleidyddol?

Gyda Chymru’n dueddol o ffafrio pleidiau gwleidyddol o’r canol-chwith a’r chwith dros y ganrif diwethaf, mae Dr Larner yn dweud bod hyn yn arbennig o wir yng nghyd-destun Cymry Cymraeg.

“Mae gennym dros 30 mlynedd o dystiolaeth arolwg ar raddfa fawr sy’n dangos bod siaradwyr Cymraeg, ar gyfartaledd, yn fwy asgell chwith yn economaidd na’r rhai nad ydynt yn siarad Cymraeg,” meddai Dr Larner.

“Mae hyn yn wir os ydym yn mesur ideoleg yn ôl hunanleoli (bod nhw’n datgan ble maen nhw’n gweld eu hunain yn wleidyddol), neu drwy ddefnyddio cyfuniad o agweddau ar yr economi ac ailddosbarthu cyfoeth.

“Rydyn ni’n meddwl mai cymdeithasoli (socialisation) gwleidyddol cynnar, y broses o ddysgu gwerthoedd a normau gan eich teulu a’ch cyfoedion, yw’r esboniad am hyn.”