Rhybuddion llifogydd yn dal mewn grym yng Nghymru ddydd Mawrth

Mae ffyrdd wedi bod ar gau mewn mannau oherwydd llifogydd, gan gynnwys mewn sawl lle yng Ngwynedd – Lôn Pont Morgan rhwng Pwllheli ac Abersoch, yr A4085 rhwng Pont Aberglaslyn a Llanfrothen a’r un ffordd rhwng Waunfawr a Rhyd Ddu.

Yn Sir Gaerfyrddin mae un ffordd wedi cau, sef Heol yr Orsaf, y ffordd o gylchfan yr A40 i orsaf drenau Llangadog.

Mae nifer o ffyrdd yng Ngwynedd sydd ar agor ond bod angen gofal wrth yrru arnyn nhw, oherwydd llifogydd.

Ymysg y rhain mae’r A497 ym Morfa Nefyn, yr A487 rhwng Penygroes a Groeslon, yr A496 rhwng Ynys a Harlech a’r A4244 rhwng Deiniolen a Rhiwlas.

Fe wnaeth Traffig Cymru alw ar bobl ddydd Llun i wirio’r rhybuddion neu gyfyngiadau ffordd diweddaraf cyn teithio ac i ystyried a oes wir angen gwneud y daith.

Does dim rhybuddion tywydd gan y Swyddfa Dywydd ar hyn o bryd ac mae modd gwirio’r rhybuddion a’r cyngor diweddaraf ar wefan CNC, dolen allanol.