‘Pryder difrifol’ am gynlluniau i addasu dalgylchoedd a chludiant ysgol

Ym Mhumsaint mae Rhidian Lloyd, 43, ei wraig, a’u plant Megan,12 , Mollie, 11, a Jac, 3, yn byw.

Er bod y pentref yn Sir Gaerfyrddin, mae’r ysgol uwchradd agosaf i’w cartref dros y ffin yng Ngheredigion, sef Ysgol Bro Pedr yn Llanbedr Pont Steffan, sydd ychydig dros 7 milltir i ffwrdd.

O dan gynigion Cyngor Sir Caerfyrddin i addasu dalgylchoedd a chludiant ysgol ar draws y sir, ysgol uwchradd Bro Dinefwr yn Llandeilo, Sir Gaerfyrddin fyddai’n cael ei hystyried fel ‘ysgol ddalgylch’ y plant – ond mae dros 15 milltir o’u cartref.

“Ar hyn o bryd, bydden nhw tua 20 munud lawr i Lanbed ar y bws,” meddai’r tad i dri.

“Tasen nhw’n mynd i Sir Gâr, lawr i Fro Dinefwr, byddech chi siŵr o fod yn siarad tri chwarter awr i awr erbyn bo’ nhw’n gwneud y stopiau i bigo plant eraill lan mewn gwahanol ardaloedd…

“Mae e’n amser hir i blentyn ar fws, chi’n siarad awr a hanner yn fwy y dydd. Iechyd meddwl y plentyn, lles y plentyn, sai’n credu byddai dim un rhiant yn moyn bod y plant ar fws am fwy o amser na sydd rhaid o gwbl.”