Negeseuon testun treuliau AS Ceidwadol yn dod i’r amlwg

Roedd y comisiynydd safonau, sy’n gyfrifol am ymchwilio i gwynion yn erbyn ASau, wedi cyfeirio cwyn ymlaen at yr heddlu, yn ôl y llu.

Mae’r BBC wedi cael gwybod bod y gŵyn wreiddiol i Mr Bain mewn perthynas â’r modd y gwnaeth Ms Jones ymdrin â honiadau o fwlio gan uwch aelod o’i staff.

Daeth honiadau am dreuliau Ms Jones i’r amlwg fel rhan o ymchwiliad Mr Bain.

Deëllir bod ymchwiliad y comisiynydd safonau yn cael ei atal tra bod ymchwiliad yr heddlu’n parhau, ac mae’r heddlu wedi siarad ag o leiaf un aelod o staff Ceidwadol fel rhan o’r ymchwiliad.

Mae BBC Cymru wedi gweld negeseuon at aelod staff, oedd wedi gofyn a ddylen nhw wneud hawliadau treuliau i’r gwleidyddion ar gyfer dyddiau pan roedd Ms Jones i ffwrdd o’r gwaith yn sâl.

Doedd dim ateb uniongyrchol i’r cwestiwn hwnnw. Fodd bynnag, cafodd graff o dreuliau arfaethedig, mae’n ymddangos, ei anfon at ffôn Ms Jones.

Dywedodd ymateb o ffôn Ms Jones: “Pe gallech chi wastad wneud mwy nag y mae’n ei ddweud, byddai hynny’n fab, diolch.” Fe’i dilynwyd gan emoji codi bawd.

Dywedodd neges arall o’r un ffôn: “Wrth wneud y peth Petrol – gwnewch fwy nag oeddwn i bob tro – ychwanegwch stwff i mewn os gwelwch yn dda ok.” Fe’i dilynwyd gan emoji codi bawd ac emoji dwylo wedi’u plygu.