Modd i’r gwaith adeiladu ddechrau ar orsaf bŵer newydd Wylfa

Mae Wylfa yn hen orsaf bŵer niwclear oddi ar arfordir Ynys Môn.

Cafodd ei hadeiladu yn y 1960au, a dechreuodd gynhyrchu trydan am y tro cyntaf yn 1971, gan gyflogi miloedd o weithwyr.

Yn 2015, caewyd adweithydd olaf Wylfa a dechreuodd y broses hir o gael ei ddadgomisiynu, gan ddod â 44 mlynedd o weithredu ar y safle i ben.

Dywedodd Chris Cholerton, prif weithredwr Rolls-Royce SMR, fod y cytundeb yn enghraifft o “oes aur” Llywodraeth y DU “o ran cyflwyno ynni niwclear newydd yn llwyddiannus gyda thechnoleg Brydeinig”.

Ychwanegodd Tom Greatrex, prif weithredwr Cymdeithas y Diwydiant Niwclear, ei fod yn “gam hanesyddol” ar gyfer pŵer glân, twf diwydiannol a swyddi medrus yng Nghymru.

“Mae’n nodi dechrau cyfnod newydd arwyddocaol a chyffrous i’r prosiect a phobl Ynys Môn,” meddai.

Dywedodd Mr Greatrex y bydd y prosiect yn dod â “buddsoddiad sylweddol” i’r ardal ac ar draws Prydain, gan sicrhau “cyflenwad hirdymor y DU o bŵer dibynadwy, carbon isel”.

Galwodd Ed Miliband, Ysgrifennydd Ynni Llywodraeth y DU, y prosiect yn “garreg filltir bwysig” ar gyfer diogelwch ynni Prydain.