Marwolaethau plant Gaza yn ysgogi gwaith celf

Tra ar drip i sêl gist car yng Ngwalchmai ar Ynys Môn, fe wnaeth Diana ddod ar draws hen goban bedydd oedd ar werth.

Dyma hi yn ei phrynu gyda’r syniad o greu darn o gelf i gofio am y digwyddiadau yn Gaza.

“Er bod hi’n hen, roedd hi’n edrych yn newydd, do’n i’m yn teimlo mod i isio defnyddio un newydd i gyfleu y gwaith celf ond ro’n i isio ôl trawma a rhyfel ar y wisg.

“Wedyn, nes i socian godra’r wisg mewn stwff llnau dreiniau, er mwyn edrych ei fod wedi pydru rhywfaint a rhwygo er mwyn dangos y rhwyg amlwg oedd o fewn y gymdeithas.

“Mi gymerodd o bosib dros rhyw wythnos iddo rhwygo fel o’n i eisiau. Ac o’n i’n meddwl os na’i adael o ryw faint mwy fydd o wedi rhwygo’n gyfan gwbl.

“Ond o’n i eisiau pwytho enwa’ y plant o dan un oed oedd wedi marw ar y wisg. Mi wnes i wedyn fynd o’r rhestr yma a mae yna dros 300 o enwau ar y wisg wedi cael eu pwytho,” meddai.

Ar ôl gweld ei bod hi’n fuddugol, roedd Diana yn teimlo balchder mawr ar ôl dod dros y sioc o ennill.

“Ro’n i wedi mopio i ddeud y gwir a dwi mor falch fod pobl wedi cymryd yr amser i bledleisio a dwi’n gobeithio bod y gwaith o bosib yn rhoi rhyw fewnolwg gwahanol ar bethau hefyd,” meddai.

Beirniaid Arddangosfa Agored 2025 oedd Llŷr Evans, Ella Louise Jones, Ffion Evans (Rheolwr Celf a Llesiant Galeri) a Nia Arfon (Prif Weithredwr Galeri).

Yr enillwyr yn y categoriau eraill oedd Sioned Medi Evans, wnaeth ennill Gwobr y Beirniaid, ac fe aeth gwobr Canmoliaeth Uchel i Gwyn Williams.