Mam yn gwerthu ei thŷ i dalu am lawdriniaeth ei babi yn America

Mae dynes o Wrecsam yn gwerthu ei thŷ i gyfrannu at gost llawdriniaeth yn yr Unol Daleithiau ar gyfer ei babi sydd â chyflwr prin ar ei galon.

Mae Jasmin Roberts, 24, wedi codi dros £950,000 o’i tharged o £1.5m i dalu am lawdriniaeth arbenigol yn Ysbyty Plant Stanford, California.

Cafodd wybod bod gan ei mab, Ollie, gymhlethdodau gyda’i galon pan oedd ond yn bythefnos oed, gan gynnwys cyflwr o’r enw atresia ysgyfeiniol (pulmonary atresia) na all gael ei drin yn y DU.

Mae Ollie bellach yn 13 mis oed, a dywedodd Jasmin ei bod yn “teimlo bod pobl yn ei garu o bron cymaint â fi”.

“Mae’r gefnogaeth mae o wedi’i gael yn anhygoel. Dwi’n credu, oherwydd fy mod i wedi bod mor agored a mor real amdano, ei fod wedi denu sylw pobl.”