‘Mae gofal plant yn ddrud’ – yr her sy’n wynebu llywodraeth nesaf Cymru

Mae tua thraean o blant yn byw mewn tlodi yng Nghymru – ffigwr sydd wedi aros yn weddol gyson yng Nghymru yn ystod y tri degawd diwethaf.

Yn ôl Comisiynydd Plant Cymru, Rocio Cifuentes, mae angen i’r targed o ddileu tlodi plant, a gafodd ei ollwng yn 2016, gael ei adfer gan bwy bynnag a fydd mewn grym.

“Dwi’n ei ystyried yn esgeulustod truenus iawn o ran dyletswydd, uchelgais a ffocws, a hoffwn weld llywodraeth nesaf Cymru yn newid hynny.

“Allwn ni ddim fforddio gweld cenhedlaeth arall o blant yn profi’r amgylchiadau ofnadwy yma ble does dim digon o fwyd ar eu byrddau,” a dim digon o arian i’w cael nhw i’r ysgol.

Mae’r prif bleidiau sy’n sefyll yn yr etholiad yma’n anghytuno o ran sut i wneud bywyd yn fwy fforddiadwy i deuluoedd sy’n ei chael hi’n anodd.

Mae’r Ceidwadwyr Cymreig, y Blaid Werdd, Llafur a’r Democratiaid Rhyddfrydol wedi addo ymestyn gofal plant am ddim, tra bod Plaid Cymru hefyd yn cynnig taliad o £10 yr wythnos i rai teuluoedd incwm isel.

Polisi blaenllaw Reform ar gyfer mynd i’r afael â chostau byw yw cwtogi ar dreth incwm.