Ai etholiad annibyniaeth yw etholiad Senedd 2026?

Yn ôl yr athro Richard Wyn Jones o Ganolfan Llywodraethiant Cymru ym Mhrifysgol Caerdydd y pleidiau hynny sydd am weld Cymru’n aros yn rhan o’r Deyrnas Unedig sydd fwyaf awyddus i wneud annibyniaeth yn bwnc trafod yn ystod yr ymgyrch etholiadol.

Mae hynny, meddai, achos eu bod nhw’n gwybod bod yna “gyfran o’r etholwyr” sy’n “elyniaethus tu hwnt tuag at y syniad”.

“Dwi ddim yn argyhoeddedig eu bod nhw’n llwyddo… Yn wahanol iawn i Ogledd Iwerddon neu’r Alban dydy’r cwestiwn cyfansoddiadol ddim yn ffurfio y tirlun gwleidyddol yng Nghymru.”

Ar y llaw arall mae yna “elfen ochelgar” i’r modd mae Plaid Cymru’n ymrafael â’r pwnc, yn ôl yr Athro Richard Wyn Jones.

“Mae’n nhw’n gwybod bod o’n mynd i godi gwrychyn rhai darpar gefnogwyr o bosib.”

Ond hefyd, “tasach chi o ddifri eisiau i Gymru fod yn annibynnol fasach chi ddim yn mynd i fewn i’r etholiad yma’n dweud, ‘da ni isio refferendwm y flwyddyn nesa’, achos mae’r arolygon barn yn awgrymu’n gryf iawn bo chi ddim yn mynd i ennill”.