Lluniau: Clwb Rygbi Aberaeron yn dathlu 50 mlwyddiant

Mae Clwb Rygbi Aberaeron yn paratoi i ddathlu carreg filltir arbennig, ei 50fed tymor.

Hefyd eleni, fe gipiodd y tîm cyntaf ddyrchafiad o Ail Adran y Gorllewin i Adran Gyntaf y Gorllewin – ac nid dyna’r unig achos i ddathlu’r tymor yma.

Roedd Glyndwr Evans yn gyd-sylfaenydd y clwb, ac roedd yn ysgrifennydd i’r clwb am 40 mlynedd. Mae dal yn hynod weithgar o fewn y clwb, ac yma mae’n adrodd yr hanes:

“Sefydlwyd Clwb Rygbi Aberaeron yn 1977, megis ddoe yw’r atgofion ond mae’r blynyddoedd wedi hedfan.

“Yn y dyddiau cynnar chwaraewyd y gemau ar gae rygbi’r ysgol yng nghanol y dref. Dyma oedd lleoliad y gystadleuaeth adnabyddus rygbi saith bob ochr a oedd yn denu chwaraewyr rhyngwladol yn flynyddol.

“Erbyn 1986 gwireddwyd y cynllun o brynu cae, sef Parc Drefach ar gyrion y dref a dyma yw ein cartref ers hynny. Mae’n safle braf iawn gyda golygfeydd dros Fae Ceredigion.”