Gohirio gwersi nofio oherwydd pwysedd dŵr isel

Er bod y tap yn rhedeg ers dydd Mawrth, dim ond mymryn o ddŵr sydd ym mhwll nofio 25m Castellnewydd Emlyn oherwydd pwysedd dŵr isel.

Dywedodd Jo Jones, sy’n gweithio ar y safle, ei fod mewn cysylltiad â Dŵr Cymru ynglŷn â’r pwysedd dŵr isel.

Mae’r grŵp sy’n rhedeg y pwll hefyd yn apelio ar gyfryngau cymdeithasol i fusnesau sydd â thanceri i helpu i gael dŵr i mewn i’r pwll.

Dywedodd Jo: “Mae Dŵr Cymru yn dweud nad eu bai nhw yw e ond does gennym ni ddim pwysedd dŵr.

“‘Da ni’n gobeithio y bydd yn gwella neu byddwn yn cael caniatâd i ddefnyddio’r hydrant tu allan – ond ar hyn o bryd mae rhaid i ni ddibynnu ar ddiferyn bach.”

Mae Dŵr Cymru wedi cael cais am sylw.