Galw am dynhau rheolau beiciau trydan wedi gwrthdrawiad ‘erchyll’

Ar ddydd Mawrth, 11 Tachwedd, fe aeth Sam Bevan allan at ei gar ar ôl rhoi ei swper yn y popty.

Munudau yn ddiweddarach fe ddeffrodd yng nghanol Fairoak Avenue ag yntau ddim yn cofio unrhyw beth am y digwyddiad.

Dim ond yn yr oriau wedi hynny – ar ôl iddo straffaglu adref gyda chrafiadau a thoriadau ar ei wyneb – y sylweddolodd bod rhywbeth o’i le.

“Roedd fy llystad yn gofyn i mi beth oedd dyddiad pen-blwydd fy mab a doeddwn i ddim yn cofio. Roeddwn i ychydig yn drist am hynny,” meddai.

Aeth Sam i Ysbyty Grange yng Nghwmbrân, gyda meddygon hefyd wedi’u drysu gyda’i anafiadau.

“Roedden nhw’n dweud wrtha’i na fyddwn i’n gallu gyrru am chwe mis, y byddai’n rhaid i mi gael profion ar fy nghalon a fy ymennydd ac roedd y cyfan yn ormod i mi mae’n rhaid i mi gyfaddef,” ychwanegodd.