Ffydd ym mhrosesau diogelu plant Gwynedd wedi’i ‘thanseilio’

Gyda swyddogion addysg wedi eu gwahodd i drafod trefniadau diogelu gyda’r Pwyllgor Craffu Addysg ac Economi, dywedodd y deilydd portffolio, Beca Brown, ei fod yn faes sydd “wedi derbyn cryn sylw yn ddiweddar am resymau amlwg”.

Dywedodd Gwern ap Rhisiart, pennaeth addysg y sir, fod diogelu yn “flaenoriaeth” i’r adran.

Ond roedd galwadau ar yr awdurdod i wneud eu prosesau diogelu yn gliriach ac yn fwy amlwg i’r cyhoedd.

Dywedodd Sharon Roberts, cynrychiolydd rhieni a llywodraethwyr Arfon ar y pwyllgor, “Fysach yn ystyried rhoi infographic interactive at ei gilydd a chyfeirio ato pan mae cyfle, fysa hynny’n amlygu bod ‘na broses eitha robust yn ei le bellach.

“A hefyd derbyn cyn lleied o hyder sydd allan yna ymysg rhieni dwi’n siarad hefo, mae pawb wedi cael sioc am beth sydd wedi digwydd.”

Yn ddiweddarach, ychwanegodd cadeirydd y pwyllgor, y Cynghorydd Cai Larsen, fod aelodau wedi cael sicrwydd fod “trefn robust yn ei le” a fod sylwadau’r swyddogion wedi “ychwanegu at yr hyder”.

Ond aeth ymlaen i ddweud: “Wnaed sylw fod ffydd y cyhoedd yn y system wedi ei thanseilio yn anffodus, ac mae hynny’n wir dydi? Waeth i ni heb a chelu oddi wrth hynny.

“Mae’n ddigon posib fyddan ni’n edrych ymhellach ar hyn yn y dyfodol agos iawn.”