Dyn 20 oed wedi marw yn dilyn gwrthdrawiad ger Pwllheli

Mae dyn 20 oed wedi marw yn dilyn gwrthdrawiad ger Pwllheli.

Cafodd Heddlu’r Gogledd a’r Gwasanaeth Ambiwlans eu galw i wrthdrawiad ar yr A499 rhwng Llanaelhearn a’r Ffôr, toc wedi 22:00 nos Sadwrn wedi adroddiadau bod sawl cerbyd, gan gynnwys Ford Fiesta du ac Audi A3 coch, wedi gwrthdaro.

Cafodd pedwar ambiwlans eu hanfon i’r digwyddiad, ond er gwaethaf ymdrechion y parafeddygon roedd gyrrwr y Ford Fiesta, sef dyn 20 oed, wedi marw yn y fan a’r lle.

Cafodd dau berson eu cludo i’r ysbyty mewn ambiwlans awyr ac un person ei gludo mewn ambiwlans.

Mae teulu’r dyn a fu farw wedi cael gwybod, yn ogystal a’r crwner, yn ôl yr heddlu.

Dywedodd y prif swyddog ymchwilio, y Sarsiant Duncan Logan o’r Uned Ymchwilio i Wrthdrawiadau Difrifol: “Rwy’n cynnig fy nghydymdeimlad dwysaf i’r teulu yn ystod yr amser anodd hwn.

“Hoffwn ddiolch yn bersonol i bawb a stopiodd i helpu a chefnogi’r gwasanaethau brys.

“Rwy’n annog unrhyw un a allai fod wedi gweld y gwrthdrawiad, neu a allai fod wedi bod yn teithio neu’n cerdded yn y cyffiniau ac sydd â lluniau o’i ffôn symudol neu dash cam, i gysylltu cyn gynted â phosibl.”