Difrod bwriadol i gloc tref Llanbed yn ‘siom enbyd’ i’r cyngor tref

Mae Cyngor Tref Llanbedr Pont Steffan yn dweud fod cloc Neuadd y Dref wedi cael ei ddifrodi’n fwriadol, a hynny yn dilyn cyfnod o’i adfer.

Dywed y cyngor tref ei fod “wedi ei siomi’n enbyd”, yn enwedig ar ôl i’r gymuned sicrhau grant i adfer y cloc yn ddiweddar.

Yn ôl y cyngor fe wnaeth unigolyn, neu grŵp o unigolion, ddringo’r sgaffaldiau sy’n amgylchynu’r cloc gan dorri i mewn i’r tŵr, torri’r gwydr hynafol a thorri dwylo’r cloc.

Mae’r unigolion wedi achosi difrod “gwerth miloedd o bunnoedd”, meddai’r cyngor tref.

Maen nhw’n annog unrhyw un sydd â gwybodaeth bellach am y drosedd i gysylltu â heddlu’r ardal.