Datgymalu a symud llong a fu’n sownd ar greigiau am fisoedd

Mae’r gwaith o symud llong 24 metr o hyd a aeth yn sownd ar greigiau oddi ar arfordir Sir Benfro wedi cael ei gwblhau dros y penwythnos.

Credir bod y ‘Resolute’ – llong gwarchod ar gyfer fferm wynt yn y môr ger Iwerddon – wedi drifftio i’r creigiau yng ngorllewin Cymru mewn tywydd garw fis Rhagfyr y llynedd.

Aeth yn sownd ger Abergwaun a bu’n rhaid achub pedwar aelod o’r criw.

Dywedodd Gwylwyr y Glannau fod y llong wedi aros yn sownd ar y creigiau ac yn gyfrifoldeb i’w pherchennog.

Dechreuodd y contractwyr morol arbenigol Jevington Logistics, o Ddoc Penfro, ar y gwaith datgymalu ar 29 Mehefin.

Dywedodd y cwmni eu bod wedi defnyddio peiriant cloddio mawr gyda siswrn wedi’i atodi iddo i dorri’r llong yn ddarnau – roedd y peiriant yn arnofio ar fad enfawr 36 metr o hyd.

Yna, cafodd y darnau mawr o ddur eu torri i ddarnau llai gan staff yn defnyddio fflam-dorwyr nwy, cyn iddyn nhw gael eu hanfon at gwmni lleol i’w hailgylchu.